«Апуш.Нәниләр» мәктәп-студиясендә тәүге спектакль!

2025-04-02 14:00 Премьералар Афиша

8 апрель көнне 16.00 сәгатьтә «Апуш.Нәниләр» мәктәп-студиясе тәүге премьерасын күрсәтәчәк. Г.Камал исемендәге Татар дәүләт академия театрының яңа бинасында тамашачылар хозурына язучы Айгөл Әхмәтгалиева әсәре буенча «Тыз-быз» спектакле тәкъдим ителәчәк.

«Тыз-быз» пьесасы әле узган ел көзендә генә Казан Мэриясенең «Алмачуар» дратматургия конкурсында җиңү яулаган иде. Инде менә беренче мәртәбә сәхнәгә дә куела. Барлык рольләрне дә «Апуш.Нәниләр» мәктәп-студиясендә шөгыльләнүче 4-8 яшьлек 36 бала уйнаячак. Спектакльне сәхнәгә куючы остаз – «Апуш.Нәниләр» мәктәп-студиясенең кураторы, актерлык осталыгы остазы, кино актрисасы, Татарстанның театр эшлеклеләре берлеге әгъзасы, җырчы Гүзәл Сибгатуллина.

«Балалар өчен бу яңа тәҗрибә, театр сәхнәсенә беренче адымнарыбызны ясыйбыз. Шуңа спектальгә бик зур дулкынлану белән тотындык, беренче премьераны Камал театры сәхнәсендә күрсәтү – бер яктан бәхет булса, икенче яктан, бик җаваплы эш. Репетицияләребез кыш башында ук башланды, рольләрне бүлү, биюләр, җырлар өйрәнү, костюмнар тектерү, декорацияләрне кайгырту – барысы да профессиональ театрлардагы кебек» – дип уртаклашты ул.

«Тыз-быз» спектакленә музыканы Россия һәм Татарстан композиторлар берлеге әгъзасы, Халыкара һәм Бөтенроссия конкурслары лауреаты Миләүшә Хәйруллина иҗат итте. Аранжировщик – Кирилл Фурсов. Тамашаның сценографы, рәссамы – Юлия Кораблева. Ут рәссамы – «Алтын битлек» Россия милли театр премиясе номинанты Илшат Сәяхов. Тавыш режиссеры – Марсель Фатыйхов. Музыкаль мөхәррир – Ильяс Фәйзрахманов.

Искәртеп узыйк, әлеге мәктәп-студия 2023 нче елны Казан Мэриясе тарафыннан Татарстан Рәисе каршындагы татар телен һәм Татарстанда яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән ачылган иде. Төп максат – мавыктыргыч дәресләр аркылы балаларда татар теленә кызыксыну уяту, нәниләрнең тел байлыкларын арттыру. Шәкертләр белән тәҗрибәле остазлар – сәхнә теленнән Татарстанның атказанган артисты, К.Тинчурин исемендәге Татар Дүләт драма һәм комедия театры актрисасы Гөлназ Нәүмәтова, вокалдан Татарстанның атказанган артисты, Татарстан Республикасы Театр әһелләре берлеге әгъзасы, Г.Кариев исемендәге Казан Татар дәүләт яшь тамашачы театры актрисасы Алсу Фәйзуллина, сәхнә хәрәкәтеннән Татарстан Дәүләт җыр һәм бию ансамбленең балет артисты, «ӘйдәБас» татар биюен үстерү остаханәсе җитәкчесе Алсу Мәгъсүмҗанова шөгыльләнә.

Нәни бал корты Тызбыз нинди маҗараларга юлыккан? Шөпшә белән Боҗан ни өчен гел этлек эшләргә генә торалар? Умартада ялкау бал кортлары да яшиме? Бал каян килеп чыга? Бергәләп җырлы-биюле умарталыкка барыйк әле – барыйк, карыйк, сорауларга җавап табыйк.

Кайда: Г.Камал исемендәге Татар дәүләт академия театрының яңа бинасындагы универсаль зал (Х.Такташ урамы, 74 йорт)
Кайчан: 8 апрель, 16:00